"Uzun illərdir fəaliyyət göstərən, öz sözünü deyən sənətkarlarımız nədənsə kinoya cəlb olunmurlar. Son illərdə çəkilən filmlərə baxanda eyni aktyorları, eyni aktrisaları görürsən. Müxtəliflik azdır. Mənə elə gəlir ki, yaşlı təbəqəyə artıq zamanını yaşamış sənətkarlar kimi baxırlar. Amma bu belə deyil. Şəxsən mən böyük kinoda çəkilmək istərdim. İllər öncə verdiyim müsahibələrdən birində də bunu demişdim ki, bizi qınamasınlar ki, niyə seriallarda çəkilirik? Biz kinoda öz yaradıcı potensialımızı göstərə bilərik, sadəcə ora dəvət yoxdur. Bu nə ilə əlaqədardır? Deməyə çətinlik çəkirəm. Sualı aktyorlara deyil, rejissorlara vermək lazımdır ki, bəs siz filan aktyorları, yaşlı sənətkarları niyə filmlərə çəkmirsiniz? Təbii ki, çoxları bu suala belə cavab verəcək ki, rol yox idi, münasib bilmədik. Amma nə deyirlərsə desinlər, bu sənətkarlara imkan yaratmaq lazımdır ki, heç olmasa 10 ildən bir, bir filmə çəkilib, öz yaşıdları arasında öz sözlərini desinlər”.
Bunu Moderator.az-a açıqlamasında xalq artisti Həmidə Ömərova deyib.
O bildirib ki, qocaman sənətkarlar- Alen Delon, Jerar Depardye, Sofi Loren də son illərdə filmlərə çəkiliblər: “Biz indi nənə rolunda da çəkilə bilərik. O qədər maraqlı, yaşlı qadın obrazları var ki. Niyə də olmasın? Sadəcə ssenari baxımından da boşluqlar var. Gənc rejissorlar da yəqin ki, həyata başqa çərçivədən baxırlar. Mən belə hesab edirəm ki, bu sual bizə yönəlməməlidir. Biz aktyoruq, ifaçılarıq. Bizi dəvət edib çəkirlər. Şükürlər olsun ki, Azərbaycan televiziya məkanında seriallar inkişaf edir. Sağ olsun ki, gənc nəslin nümayəndələri bizi çağırıb çəkir. Həm cavanlara dəstək oluruq, həm də öz yaradıcı potensialımızdan yararlanır. İllərlə oturub gözləmirik ki, nə vaxtsa bizi hansısa bədii filmə çağıracaqlar. O qədər tarixi mövzuda filmlər çəkilə bilər ki. O qədər bizim tarixi qəhrəmanlarımız olub ki. Onlar təkcə cavan olmayıblar ki. Onlar yaşa da dolublar. Biz həmişə ümidlə yaşamışıq. İndi də ümidlə yaşayırıq ki, birdən hansısa rejissor bizi xatırlayar, öz filminə dəvət edər. Biz yaşlı nəslin nümayəndələrini elə bir rola çağırmaq lazımdır ki, bu rolla sən nəsə yenilik edə biləsən. Bu baxımdan əlbəttə ki, çətindir. Ümid edirəm ki, bu problem həll olunacaq. Bu dünyanı tərk etməmiş böyük kinoda da rol ala biləcəyik”.
