"Həzi Aslanov" metrostansiyası yaxınlığında antisanitar vəziyyət ciddi narazılıq yaradıb.
Bu barədə həmin ərazidə yaşayan sakinlərdən biri Bakuplus.az-a müraciət edib.
Sakin bildirib ki, hər gün axşam saatlarında küçə alverindən sonra artıq qalan xarab meyvələr zibil konteynerlərinə deyil, yolun kənarına atılır. Nəticədə tullantıların suyu işlək yola axaraq üfunət qoxusu ətrafı bürüyür:
"Gündüz alverçilərin yolu zəbt etməsindən bezmişik, axşam da bu biabırçı vəziyyətdən. Zibil qabları insanların istifadə etdiyi küçənin ortasındadır. Yolun vəziyyəti də bərbad haldadır. Çirkab suları axaraq işlək yolun ortasına yığılır".
Sakinlər aidiyyəti qurumların əraziyə ciddi baxış keçirmələrini və lazımi tədbir görməsini tələb edirlər.
Xatırladaq ki, daha əvvəl də "Həzi Aslanov" metrostansiyasının çıxışında küçə ticarətinin piyadaların hərəkətinə mane olması ilə bağlı sakinlərin şikayətini paylaşmışdıq. Vətəndaşlar yol kənarında qurulan meyvə-tərəvəz piştaxtalarının keçidi daraltdığını və ərazidə sıxlıq yaratdığını bildirmişdilər.
