Bir neçə gündür sosial şəbəkələrin erməni seqmentində sözün əsl mənasında zəlzələ effekti yaşanır. Buna səbəb isə bir qrup iranlı turistin İrəvanın mərkəzindəki Respublika meydanında ucadan “Qarabağ” mahnısını ifa etmələridir. Elə əsl erməni xisləti də özünü burada göstərir. Kadrlardan tam aydın olur ki, İran azərbaycanlılarının ifası zamanı ətrafda çoxsaylı ermənilər olsa da, bu mahnıya reaksiya verən tapılmır. Amma gəl ki, sonradan sosial şəbəkələri dolaşan bu qısa videoçarx cəmiyyəti əməlli-başlı silkələyib. İş o həddə çatıb ki, bir sıra haylar status yazaraq, “İrəvanı türklərə pay verəcəklər”, “bu gün mahnı oxuyan sabah bizi evimizdən çıxarar” tipli qaraçılığa, təbliğata başlayıblar. Hər zaman olduğu kimi, ara qarışıb məzhəb itəndə bu işdən faydalanmağa çalışan müxalifət yenidən boy göstərib. Ayaqqabıları əlində onlayn KİV-lərdə növbəyə duran deputat, politoloq, şərqşünas, türkoloq kimi tiplər ard-arda gurultulu bəyanat verir, müharibənin qapıda olduğunu, baş nazir Nikol Paşinyanın Zəngəzuru Azərbaycana təhvil verəcəyi barədə fikirlər səsləndirirlər. Yaxşı, əgər mərkəzi meydanda bir qrup İran azərbaycanlısı mahnı oxuyubsa, bunun Zəngəzurla, İrəvanın peşkəş verilməsi ilə nə əlaqəsi? Adi bir mahnının erməni cəmiyyətini bu qədər qorxuya salmasının əslində dərin səbəbləri var. İlk olaraq, onu qeyd etmək lazımdır ki, bu cəmiyyət hələ də sülhün nə olduğunu, dinc şəraitdə yaşamağın əslində birbaşa Ermənistan üçün nə qədər lazım olduğunu dərk etmir, dərk etmək istəmir. Revanşist fikirlər bu cəmiyyətdə dərin kök atıb və milləti xəstələndirib. 2020-ci il müharibəsindən dərs çıxara bilməyənlər yenidən meydan sulayır.
İkincisi, hadisələrin kənardan idarə edildiyi gün kimi aydındır. Əgər cəmiyyət bu mahnı əleyhinə idisə, niyə həmin axşam Respublika meydanında müdaxilə edən, heç olmasa, etiraz edən bir başıpapaqlı tapılmadı? Niyə sonradan evinə gələn hər kəs klaviatura arxasında şirə dönüb uydurma kral Tiqrana qədər gedib çıxır? Saxta tarixi ortaya atan, insanları təxribata səsləyən qüvvələr kimlərdir? Bu qarışıqlıq, anarxiya kimə lazımdır?
Üçüncüsü, əgər bir mahnı həqiqətən İrəvanda belə effekt yaradıbsa, bu, əslində erməni cəmiyyətinin psixoloji vəziyyətindən də xəbər verir. Adamın bir anlıq Nikol Paşinyana yazığı gəlsə də, dərhal onun da hansı oyunların içində olduğunu xatırlayıb “rəhbər necədirsə, xalqı da elədir” misalını xatırlayırsan.
İndi isə gələk işin pərdəarxasına, bunu tam aydınlaşdırmaq, üzə çıxarmaq üçün erməni KİV-lərdə yayılan yüzlərlə xəbəri oxumaq, süzgəcdən keçirmək lazımdır. Deməli, məlum olub ki, bu xəbəri Qarib Babayan adlı bir erməni sosial şəbəkədə yayıb və xalqı qızışdırıb. Kimdir bu Qarib? 70 yaşlı Qarabağ ermənisi. Nə işləyir? Deyilənə görə, alimdir, elm xadimidir. Yaxşı, bəs Qarib niyə bu videoçarxı yayıb, xalqı təhrik edir, hələ üstəlik dövləti də təhqir edir? Axı, bilir ki, bu yazdıqlarına görə barəsində cinayət işi açılacaq. Aha, elə hadisələrdən də buradan sonra üzə çıxmağa başlayır. Ermənistanın İstintaq Komitəsi araşdırma apararaq, videonu yayaraq təxribata cəhd edən şəxsi həbs edir və məhkəməyə göndərir. Elə həngamə də buradan başlayır. Kiminsə fitili, təşviqi ilə başıpozuq kütlə məhkəmə qarşısına axışır, niyəsə orada da Azərbaycan əleyhinə, sülh əleyhinə şüarlar səsləndirilir, siqnal səsi İrəvanı silkələyir. Aha, bəs həmin gecə Babayanın müdafiəsinə kim qalxır? Hayastan fraksiyasının deputatları! Kimdir bu Hayastan fraksiyasının rəhbəri? Ermənistanın ikinci prezidenti Robert Köçəryan! Deməli, bu işlərin başında Robert Köçəryan durur. Axı niyə? Çünki Köçəryanın kürkünə birə düşüb. Artıq o dərk etməyə başlayıb ki, Azərbaycanla Ermənistan arasında imzalanacaq sülh müqaviləsi onun üçün heç də yaxşı bitməyə bilər. Bir də görərsən ki, əli-qolu qandallı Robert Arayikin kamera yoldaşı kimi Bakıya “qonaq gətirilib”. Axı, Azərbaycan əleyhinə bir sıra cinayətlərdə birbaşa onun əli var!
Bunun qarşısını almaq üçün nə etmək lazımdır? Prosesi baltalamaq! Bu işdə kimdən istifadə etmək olar? Qarabağ ermənilərindən! Xalqın həssas damarına basmaq lazımdır, lazımdır! Aha, meydanda iranlı azərbaycanlılar Qarabağ mahnısı oxuyublar? Reaksiya yoxdur? Bu dəqiqə həll edərik, kütləni qızışdırarıq! Səbəb? Çünki baş nazir Paşinyanın son açıqlamaları prosesin sülhə doğru getdiyinə bir daha dəlalət edir.
Dərd də orasındadır ki, Ermənistanda təxribata cəhd edən təkcə Köçəryan deyil. Bunun üçüncü prezident Serj Sarkisyanı, Qərbin qucağında oturan siyasətçiləri, deputatları, ABŞ ilə qol-boyun olmaq üçün sinov gedən məmurları, altdan-altdan baş nazir postuna göz dikənləri və daha nələri, nələri var.
Amma bu hayların unutduğu bir məqam var ki, Dəmir Yumruq hər zaman başlarına enə bilər. Azərbaycanın da səbrinin bir həddi var, bu həddi aşmaq İrəvana bu dəfə daha baha başa gələ bilər. Ona görə də, gələn dəfə Respublika meydanında əgər İran azərbaycanlıları Qarabağ, İrəvanda xal qalmadı mahnısını oxusalar, haylar zəhmət çəkib qol qaldırıb oynasınlar, hələ bir gəlib şabaş da versinlər!
Kamran Rza
