Qızını söydüyünə görə qonşusunu qətlə yetirməkdə təqsirləndirilən Nahid Həsənovun cinayət işi üzrə məhkəmə prosesi davam etdirilib.
Lent.az-ın əldə etdiyi məlumata görə, Bakı Ağır Cinayətlər Məhkəməsinin hakimi Leyla Əsgərova-Məmmədovanın sədrliyi ilə keçirilən prosesdə təqsirləndirilən şəxs ifadə verib.
Onun sözlərinə görə, hadisə söyüş üstündə baş verib:
"Bəhruz mənə vatsapda zəng elədi. Çölə çıxanda mənə dedi ki, deyəsən məktəb illərin yadından çıxıb. Bizim uşaqlarımız dava etmişdi. Mənim var-yoxumu söydü. Sonra görüşdük əlbəyaxa olduq. Usta olduğum üçün mən üzərimdə həmişə bıçaq daşıyıram. Mən fəhlə işləyirdim kabellərin ağzını kəsmək üçün bıçaqdan istifadə edirdim. Mərhum məndən çox güclü idi və yaxınlaşan kimi təpiklə sinəmə çox güclü zərbə vurdu. Üzərimdəki bıçağı da onu qorxutmaq üçün çıxartdım. Mən bıçağı onun kürəyinin aşağı tərəfindən vurdum. Hadisədən 2 saat sonra o dünyasını dəyişdi. Özüm gedib polisə təslim oldum. Əməlimdən peşmanam".
Məhkəmənin növbəti iclası fevralın 24-nə təyin edilib.
İstintaqla müəyyən edilib ki, o, qonşusu Bəhruz Məmmədovun bacısı oğlu Muradlı Əbəlfəzlə öz övladı Osman Həsənov arasında həmin kompleksin həyətində baş vermiş mübahisənin səbəbini aydınlaşdırmağa çalışıb.
Bu zaman Nahid Həsənov Bəhruz Məmmədovun onun övladı Ayan Həsənovanın ünvanına nalayiq ifadələr işlətməsini öyrənib. Buna görə onu öldürərək, qisas almaq qərarına gəlib.
Bu məqsədlə Nahid Bəhruz Məmmədovu kompleksin həyətində görüşə dəvət edib və cinayətkar niyyətini həyata keçirmək üçün özü ilə bıçaq da götürüb.
Nahid Həsənov həmin gün "Qobu Park-3" yaşayış kompleksində yerləşən 37 nömrəli binanın yan tərəfindəki yol ayırıcında Bəhruz Məmmədovla görüşərkən şəxsi münasibətlər zəminində əlbəyaxa olub. Bu zaman onun bədəninin müxtəlif nahiyələrinə zərbələr endirib.
Daha sonra üzərindəki bıçaqla Bəhruz Məmmədovun kürək nahiyəsinə 1 ədəd həyati təhlükə sayılan zərbə endirib. Nəticədə Bəhruz Məmmədov kəskin daxili qanitirmədən ölüb.
Ona qarşı Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.
