"Əlbəttə ki, yaxşı yer tutmağı çox istəyirik".
Bunu “Avroviziya-2025” beynəlxalq mahnı müsabiqəsində Azərbaycanı təmsil edəcək “Mamagama” qrupunun solisti Asəf Mişiyev Bakuplus.az-a açıqlamasında deyib.
İfaçı müsabiqə ilə bağlı fikirlərini açıqlayıb:
"Əlimizdən nə gəlirsə, ən yaxşısını etməyə çalışacağıq. Ancaq nəticə ilə bağlı xüsusi bir gözləntimiz yoxdur".
O, ifa edəcəkləri mahnının yaddaqalan olduğunu vurğulayıb:
Artıq birinci nəqarətdən melodiya yadda qalır. Əslində, biz müsabiqəyə beş mahnı göndərmişdik. Onların içərisindən məhz "Run with U" seçildi. Bu musiqi ilə göstərmək istəyirik ki, Azərbaycanda radio-hit formatında da mahnılar yazılır. Bizim ölkəmizdə bunu da bacarırlar. Sözügedən mesaj çox vacibdir.
İndi dünyada insanın ürəyinə yatan melodiyalar çox azdır. Biz bu musiqidə melodiyaları ön plana çəkirik".
Asəf rəsmi klipdə “Avroviziya” təmsilçilərimiz İlkin Dövlətov, Fahree, Tural və Turan qardaşlarının yer almasını şərh edib:
"Bununla bir ailə olduğumuzu göstərmək istəyirik. Ümumiyyətlə, öncəki Avroviziya təmsilçilərimizdən böyük dəstək görmüşük.
Məsələn, Nadir Rüstəmli həmişə bizi dəstəkləyib. Onun böyük ürəyi var. Mən Nadirin sənətinə vurğunam. Nadir çox istedadlıdır".
Azərbaycan yəhudisi olan Asəf Mişiyev "Neftçi" sevgisindən də danışıb:
"Dünya futbolunda "İnter"i ölkəmizdə isə "Neftçi"ni dəstəkləyirəm. Bakıda böyümüşəm və uşaqlıqdan bəri "Neftçi" azərkeşiyəm. Bu komandanın yeri mənim üçün bir başqadır. Hətta dostlarımdan xahiş etmişəm ki, mənim üçün "Neftçi" nin retro formasını tapsınlar. Əgər tapmaq alınmasa, özüm tikdirməyi düşünürəm. Bu yaxınlarda Amsterdamda çıxışımız olacaq. İstəyirəm ki, oradakı gəzintilərdə "Neftçi"nin formasında olum".
Qeyd edək ki, Bazeldə keçiriləcək 69-cu “Avroviziya” mahnı müsabiqəsi mayın 13-dən 17-nə qədər davam edəcək. “Mamagama” birinci yarımfinal mərhələsinin ikinci hissəsində səhnəyə çıxacaq.
Aytac Sahəd
