Binəqədi rayonunun Biləcəri qəsəbəsi, Yəhya Hüseynov küçəsində quraşdırılan zibil qutuları sakinlərin hərəkətinə maneə törədir. Bu haqda bu gün, 31 oktyabr tarixində Bakuplus.az ATV Xəbər-ə istinadən məlumat verir.
Sakinlər deyirlər ki, vaxtlı-vaxtında yığılmasa da, 30 ildən çoxdur ərazidə məişət tullantıları qutularının daimi yeri olub. Bir gün bilinməyən səbəbdən qutuların yerini dəyişərək, təxminən 50 metr kənardakı piyada səkisinə qoyublar. Nəticədə həm antisanitar vəziyyət, həm də insanların həyatı üçün təhlükə yaranıb.
Zibillər vaxtlı-vaxtında daşınmadığı üçün ətrafa dağılır və insanlar həyatlarını riskə atmaq bahasına yolun avtomobillər üçün nəzərdə tutulan hissəsinə çıxmağa məcbur olurlar.
Biləcəri qəsəbə bələdiyyəsindən bildirildi ki, məişət tullantılarının yığılması və zibil qutularının yerləşdirilməsi ilə bağlı işləri bələdiyyə aparmır.
Binəqədi Rayon İcra Hakimiyyətindən isə bildirildi ki, problem qurumun nəzarətindədir, tezliklə aradan qaldırılması istiqamətində işlər görülür. Səkidəki tullantı qutularının yeri yaxın vaxtlarda dəyişdiriləcək.
