Bakının Sabunçu rayonu, Maştağa qəsəbəsində yerləşən 18-ci əsrə aid Məmmədbağır qəbiristanlığı baxımsız vəziyyətdədir. Bu haqda bu gün, 20 avqust tarixində Bakuplus.az Xəzər Xəbər-ə istinadən məlumat verir.
Burada yerləşən qəbirlərin əksəriyyətini su, bəzilərini isə qamış basıb, məişət tullantıları qəbiristanlığın girişinə yığılıb.
Sakinlər bu problemin 10 ildən artıqdır müşahidə olunduğunu və son vaxtlar daha da kəskinləşdiyini deyirlər.
Yerli sakin Ataməli Nəbiyev deyir ki, gəlib qəbirlərə uzaqdan baxmaqdan başqa çarəsi yoxdur. Çünki bataqlıq, qamışlıqla yanaşı, burada çox sayda ilanlar da olur.
Maştağa bələdiyyəsinin sədr müavini Ağanəcəf Qədirov isə bildirir ki, qəbiristanlıq həmin ərazidən təxminən 8 metr aşağıda yerləşir. Ərazidə qrunt sularının səviyyəsi də yüksəkdir. Hər il qamışlıq biçilsə də, eyni vəziyyət yaranır.
“Bu il başqa tədbir də nəzərdə tutmuşuq, qamışları doğranından sonra onların göyərməsinə imkan verməmək üçün üzərilərinə xüsusi torpaq vurulacaq, həm də ərazidə torpağın səvəyyəsi qaldırılacaq”, - deyə Qədirov vurğulayıb.
Sədr müavini vəd edib ki, sentyabr ayınadək bu problem həll ediləcək.
