Bakıda qətl törətməkdə ittiham olunan Elsevər İslamovun cinayət işi üzrə məhkəmə prosesi davam etdirilib.
Bakuplus.az-ın xəbərinə görə, bu gün Bakı Ağır Cinayətlər Məhkəməsində hakim Elmin Rüstəmovun sədrliyi ilə keçirilən prosesdə şahidlər ifadə verib.
55 saylı məktəbin müəllimi Rasim Tağıyev ifadəsində bildirib ki, hadisə baş verən gün qeyri-iş günü olub:
“Elsevər müəllim mənə həmin gün zəng edib axşam kafedə oturmağı təklif etdi. Razılaşdım. Biz axşam saatlarında kafedə əyləşdik. Yeyib-içdikdən sonra təxminən saat 22:00 radələrində qalxdıq. Taksi ilə “Koroğlu” metrosu istiqamətində getdik. Metroya çatmamış mən düşdüm, o, taksi ilə yoluna davam etdi”.
Şahid bildirib ki, hadisə baş verən günün səhəri Elsevərlə əlaqə saxlayıb: “Mən onunla danışdım, vəziyyətini soruşdum. O, hər şeyin yaxşı olduğunu, sükan arxasında olduğu üçün danışa bilmədiyini dedi. Mən məktəbə gələndə belə hadisədən xəbərim olmayıb. Eşitdim ki, Natiq işıqları sönülü, qapıları açıq saxlayaraq gedib”.
Daha sonra digər şahid Malik Bayramov ifadə verib.
“Mən kafedə kababçı işləyirəm. Elsevərlə sinif yoldaşı olmuşam. O, mənə səhər zəng edib kabinet sifarişi verdi. Onlar gəlib yeyib-içdikdən sonra getdilər. Hadisəni televiziyadan eşitmişəm”.
Daha sonra hər iki şəxsin ibtidai istintaqa verdiyi ifadə elan olunub.
Zərərçəkən şəxsin hüquqi varisinin nümayəndəsi vəsatət qaldıraraq deyib ki, işə daha ağırlaşdırıcı maddələrlə baxılmalı, məhkəmə baxışına xitam verilməli və prokurorluğa geri qaytarılmalıdır.
Dövlət ittihamçısı vəsatətin baxılmamış saxlanılmasını təklif edib.
Vəsatət baxılmamış saxlanılıb.
Proses fevralın 17-də davam etdiriləcək.
Qeyd edək ki, qətl hadisəsi ötən ilin may ayında, Bakının Xətai rayonu ərazisində, 55 saylı orta məktəbdə baş verib. 1964-cü il təvəllüdlü Natiq Mehdi Məhəmməd oğlunun itkin düşməsi barədə polisə daxil olmuş müraciət üzrə araşdırma aparılıb.
Natiq Mehdi Məhəmməd oğlunun iş yoldaşı 1966-cı il təvəllüdlü İslamov Elsevər Eldar oğlu tərəfindən şəxsi münasibətlər zəminində qətlə yetirilməsinə əsaslı şübhələr müəyyən edib. Elsevər İslamov polis tərəfindən saxlanılaraq istintaqa təhvil verilib.
Natiq Mehdi (Ulubəy) Məhəmməd oğlu Müsavat partiyasının fəallarından olub.
O, son qurultaydan əvvəl partiya başqanlığına namizədliyini irəli sürüb. İsa Qəmbər namizədliyini verdikdən sonra namizədliyini geri götürüb.
Onun qətlin üstü açılandan bir neçə gün əvvəl maşını ilə itkin düşdüyü bildirilib.
Elsevər İslamov 55 nömrəli orta məktəbdə təsərrüfat işləri üzrə direktor müavini vəzifəsində çalışıb.
Ona Cinayət Məcəlləsinin 120.2.4, 245, 309.2 maddələri üzrə ittiham elan olunub.
Fidan İlqar
