Sabunçu rayonunda kanalizasiya sisteminin olmaması sakinləri narahat edir. Bu haqda BakuPlus.az sosial şəbəkələrə istinadən bu gün, 18 avqust tarixində xəbər verir.
Rayonun Ramana qəsəbəsi, “1-ci sahə” adlanan ərazisində yaşayanlar bildiriblər ki, küçədən kanalizasiya sistemi keçir, amma evlərin tullantı sularının həmin şəbəkə ilə axıdılmasına icazə verilmir.
Vətəndaşlar qeyd edib ki, payız və qış aylarında ərazidə gölməçələr yaranır, yollar keçilməz olur:
“Ən çox həmin fəsillərdə əziyyət çəkirik. Eyni zamanda, yolların asfalt örtüyü də yoxdur. Yağış sularının kanalizasiya sistemi ilə axıdılması üçün asfalt problemi də həll edilməlidir”.
Məsələ ilə bağlı Sabunçu Rayon İcra Hakimiyyətindən bildirilib ki, rayonun Bakıxanov, Sabunçu və Zabrat qəsəbələrinin bir hissəsi istisna olmaqla, digər qəsəbələrində kanalizasiya şəbəkəsi mövcud deyil:
“Hazırda Pirşağı qəsəbəsində çirkab su təmizləyici qurğunun tikintisi ilə bağlı son tamamlanma işləri aparılır. İşlər başa çatdıqdan sonra aidiyyəti üzrə “Azərsu” ASC tərəfindən dövlət proqramları çərçivəsində digər qəsəbələrdə də, o cümlədən Ramana qəsəbəsində, mərkəzləşdirilmiş şəbəkənin yaradılması məsələsinə baxılacaq.”
Qeyd olunan ərazidə mövcud olan yağış barmaqlıqları yağış sularının axıdılması üçün nəzərdə tutulub. Bu işlər başa çatdıqdan sonra aidiyyəti üzrə Azərbaycan Avtomobil Yolları Dövlət Agentliyi tərəfindən küçənin asfaltlanması ilə bağlı məsələyə baxılacaq.
Yaşayış massivində “Bakı Abadlıq Xidməti” MMC tərəfindən qəsəbədə aparılan abadlıq işləri çərçivəsində kanalizasiya xətti çəkilib. Fərdi yaşayış evlərinin həmin xəttə qoşulması aidiyyəti qurumlar tərəfindən mərhələli şəkildə aparılır”.
[caption id="attachment_59533" align="alignnone" width="800"]
Foto açıq mənbədən[/caption]
