Paytaxtın Sabunçu rayonu, Zərdabi küçəsi, 13 ünvanında 8 ailə hər an uçmaq təhlükəsi olan, 1880-ci ildə tikilən binada yaşamağa məcburdur. Bu haqda bu gün, 19 sentyabr tarixində Bakuplus.az ATV Xəbərə istinadən məlumat verir.
19-cu əsrdə sözügedən tikililərdə mülkədarlar yaşayıbar. Yuxarı hissələrdə onların özləri məskunlaşıb. Binanın aşağı hissəsində onların atları saxlanılırmış. Hazırda da, yəni XXI əsrin 22-ci ilində də bu tikilidə insanlar yaşamağa məcburdurlar.
Sakinlər deyirlər ki, burada keçən hər gün ölüm-dirim mübarizəsidir. Məcburiyyətdən burada yaşayan sakinlər 142 yaşlı tikilidən canlarının qurtalacağı günü gözləyirlər.
Sabunçu Rayon İcra Hakimiyyətindən (RİH) bildirildi ki, rayon ərazisində 177 qəzalı bina var. Onlardan 19-u barədə Fövqəladə Hallar Nazirliyi (FHN) qəza aktı tərtib edib. 17 binanın isə təmirə ehtiyacı olduğu müəyyən olunub. RİH siyahıları tərtib edərək aidiyyəti üzrə qurumlara təqdim edib və yekun qərarı gözləyir.
