Xəzər rayonu ərazisində küçə və parkların, məhəllə və binaların abadlaşdırılması, yeni infrastrukturların yaradılması, yaşıllıqların salınması işləri uğurla davam etdirilir. Bu haqda BakuPlus.az RİH-nin mətbuat xidmətinə istinadən bu gün, 20 sentyabr tarixində xəbər verir.
Şüvəlan qəsəbəsinin Lev Starçuk küçəsi, 1, 3, 5 saylı binaların qarşısındakı məhəllələrdə abadlıq işlərinə başlanıb.
Sözügedən məhəllə uzun müddət yığılıb qalmış istifadəsiz materiallardan, bərk məişət tullantılarından təmizlənib, binaların yağış, su navalçaları, bloklarda yararsız şüşələr yeniləri ilə əvəz olunub, giriş qapıları rənglənib.
Bundan əlavə, məhəllədəki köhnə bordürlər yenilənib, binaların fasad hissələrində suvaq işləri görülüb.
Aparılan abadlıq işləri çərçivəsində sutkanın qaranlıq saatlarında məhəllənin işıqlandırılması məqsədilə 5 ədəd yeni elektrik dirəkləri basdırılaraq, işıqlandırma sistemi ilə təchiz olunmuşdur.
Hazırda abadlaşdırılması davam edən məhəllədə asfalt çəkilişləri yekunlaşdıqdan sonra yeni ağac və gül kollarının əkilməsi, sakinlərin asudə vaxtlarının səmərəli təşkili üçün oturacaqların, söhbətgahların quraşdırılması nəzərdə tutulmuşdur.
Görülən abadlıq-quruculuq işlərinin davamı olaraq rayonun Türkan qəsəbəsinin girişində qəsəbənin adını bildirən lövhə təmir edilmiş, ətrafında təmizlik və abadlıq işləri aparılmışdır.
