Bakının Xəzər rayonu ərazisində qanunsuz su təchizatı şəbəkəsi yaratmaq cəhdlərinin qarşısı alınıb. Bu haqda bu gün, 20 avqust tarixində Bakuplus.az “Azərsu” ASC-yə istinadən xəbər verir.
Özlərini adıçəkilən qurumun işçiləri kimi təqdim edən bir qrup şəxs ödəniş qarşılığında vətəndaşların evlərinə su xətti çəkib. Belə ki, rayonun Mərdəkan qəsəbəsində Raco adlı şəxs gecə saatlarında xüsusi texnika vasitəsilə müvafiq işlər görüb, nəticədə yolun örtüyünü dağıdıb və 600 metr uzunluğunda su borusu çəkib.
Həmçinin, Buzovna qəsəbəsində qanunsuz olaraq su xətti çəkən şəxs bir neçə fərdi yaşayış binasının birləşdirilməsi üçün sakinlərdən pul tələb edib. Vədlərə aldanan bəzi vətəndaşlar tələb olunan məbləği ödəyiblər.
Həmin şəxslər sayğacların qoyulacağını, abonent kodlarının veriləcəyini vəd etsələr də, sonradan yoxa çıxıblar.
"Vətəndaşlara tövsiyə edirik ki, bu cür təkliflərə aldanıb sövdələşməyə getməsinlər. Çünki belə hallarda sənədləşmə aparılmır, abonentlər sayğacla təmin edilmir və kod verilmir. Üstəlik qanunsuz çəkilmiş su xətləri ləğv edilir, - deyə qurumdan bildirilib.
[URIS id=60014]
