”Neftçi” rəhbərliyi səhvi mövsümün əvvəlində etdi. Mutu, Miodraq kimi təyinatlaracan gedib çıxmıram. Mövsüm öncəsi Roman Qriqorçukun ağlasığmaz hazırlıqsızlığı, çempionata dırnaqarası yanaşması və təkəbbürlü idarəçiliyi bir sezonu zibilxanaya atdı”.
Bu sözləri Bakuplus.az-a açıqlamasında apasport.az saytının baş redaktoru Rasim Sultanzadə deyib.
Rasim Sultanzadə deyib ki, Roman Qriqorçuk mövsüm öncəsi hazırsızlığını “Neftçi”dən gedəndən sonra Ukrayna mətbuatına etiraf edib: “Bundan başqa o köməkçi, fiziki hazırlıq üzrə məşqçilərin verdiyi raportları ciddiyə almadı, hər şeyi bildiyini düşündü. Ağlı Qəbələdə işlədiyi vaxtda qaldığından çempionata ciddi yanaşmadı”.
Baş redaktor bildirib ki, indiki halda radikal dəyişikliklər lazım olan effekti verməyəcək: “Radikal dəyişikliklərə misal olaraq baş məşqçi dəyişikliyi, birdən-birə 10-dan çox futbolçu ilə yolların ayrılması, rəhbərliyin istefası kimi şeyləri göstərmək olar. Amma demək olar ki, belə şeylərin çoxu daha əvvəl baş verib və bir nəticə hasil olmayıb. Əvvəla problemi, sonra həll yolunu müşahidələrimə əsasən deyim. İndiyə qədər gətirilən faciəvi oyunçular, qurula bilməyən sistem, inana bilməyəcəyiniz dərəcədə pis hazırlıq, təlim-məşq toplanışı... Məncə, artıq ən azyaşlı azarkeş də problemin indiki baş məşqçidə olmadığını bilir. Bir mövsümü qurtarmaq göstərici deyil. Birmənalı olaraq Samir Abasovla müqaviləni uzatmaq və vaxtilə “Qarabağ”ın Qurban Qurbanova göstərdiyi səbri, dözümü ona da göstərmək lazımdır. Qoy, 3 il də nəticə olmasın, 5 transferdən 2-si yaxşı olsun, amma o sistem, o komanda qurulsun. “Neftçi”nin dövrü başlasın. Rəhbərlik məsələsinə gəldikdə isə dediyim kimi, düşünürəm ki, ən böyük səhv yayda Qriqorçuku komandanın başına gətirmək oldu. Başda mən olmaqla, hamı rəhbərliyin bu təyinatını alqışlasa da, gördük ki, zaman həmin zaman deyil, Roman da... Açıq danışacam, futbolçuların əksəriyyəti çox zəifdir, keyfiyyəti aşağıdır. Bu gün mən baş məşqçi olsam yayda bu komandadan maksimum 4 futbolçu saxlayıb, qalanını göndərərəm. Sek, Emin Mahmudov, Murad Məmmədov... Azarkeşlərə səslənirəm, görün, siz komandada saxlamağa 5 oyunçu tapa bilirsiz? Abasovun adicə Sumqayıtındakı İsa Süleyman kimi bir müdafiəçisi var “Neftçi”də? Əvvəla bunları düşünmək lazımdır. 6 aydan, 1 ildən bir məşqçi dəyişməklə uğur qazanılmır. Uğurun açarı stabillikdir, sistemdir. “Neftçi” o vaxt Qurban Qurbanovu “Qarabağ”a bağışladı, “Qarabağ” zaman verdi, səbirli oldu, o da sistemini qurdu. İllərdir də Azərbaycan futbolu “Qarabağ”ın çörəyini yeyir. Stabillik. Bundan sonrakı prosesdə rəhbərlik də, Samir Abasov da qulağını tutub, dişini sıxıb, başını aşağı salıb işləməlidir. Cəfalı periodu keçəndən sonra azarkeşlərlə birlikdə səfa sürüb, “Neftçi” dövrünü böyük zövqlə izləyəcəklər...”
Kamran Rza
