“Qarabağ” - “Viktoriya” oyununa iTicket.az saytından bilet alarkən pulu çıxılan, ancaq bilet əldə edə bilməyənlər barədə açıqlama verilib. Bu haqda BakuPlus.az Xəzər Xəbər-ə istinadən bu gün, 16 avqust tarixində xəbər verir.
Məsələ ilə bağlı ''iTicket'' şirkətinin direktoru Kamran Abasov bildirib ki, lazımi hazırlıq tədbirləri görülsə də, oyuna maraq həddindən artıq olduğundan, saytın serverləri çöküb və onlayn satış bir neçə saatlıq dayandırılıb. Buna baxmayaraq, satış nöqtələrində fiziki bilet satışları davam edib.
Kamran Abasov əlavə edib ki, kartından pul çıxılan, amma bilet ala bilməyənlərin vəsaitləri 1 gün ərzində geri qaytarılacaq.
O, qeyd edib ki, qaydalara əsasən, bir şəxsiyyət vəsiqəsi ilə maksimum 3 bilet almaq mümkündür.
Hazırda ''qara bazar'' şübhələrinin tam aradan qaldırılması istiqamətində işlər aparılır və ''Qarabağ''ın növbəti oyunlarında ''bir bilet - bir şəxsiyyət vəsiqəsi'' prinsipi yenidən tətbiq ediləcək.
