Baş Prokurorluq və Təhsil Nazirliyi Bakıda 7 yaşlı məktəblinin ölümü ilə bağlı rəsmi məlumat yayıb. Bu haqda bu gün, 17 may tarixində Bakuplus.az məlumat verir.
Mayın 16-da Sabunçu rayon prokurorluğuna 11 saylı internat məktəbinin daun sindromlu şagirdi Svetlana Vəliyevanın ölümü ilə bağlı məlumat daxil olub.
İlkin araşdırma zamanı müəyyən edilib ki, Svetlana Vəliyevanın vəziyyəti pisləşdiyi üçün təcili yardım çağırılıb. Lakin göstərilən tibbi yardıma baxmayaraq, mayın 16-da saat 06:00 radələrində məktəblinin vəziyyəti qəfil pisləşib və o, dünyasını dəyişib. Məhkəmə-tibb ekspertinin iştirakı ilə keçirilən baxış zamanı S.Vəliyevanın üzərində hər hansı xəsarət və zorakılıq əlamətləri aşkar edilməyib. Hazırda araşdırmalar davam etdirilir.
Həmçinin bildirilir ki, ötən ilin oktyabrında S.Vəliyeva kəskin respirator infeksiya (neyrotoksikoz) səbəbindən uzun müddət xəstəxanada olub.
