Bakıda 9 saylı marşrut xəttinin sürücüsü tanımadığı şəxs tərəfindən döyülüb. Bu haqda bu gün, 13 yanvar tarixində Bakuplus.az Qafqazinfo-ya istinadən məlumat verir.
Sürücünün sözlərinə görə, hadisə yanvarın 10-da axşam vaxtı baş verib.
“Tbilisi prospektindən “20 Yanvar” dairəsinə doğru hərəkətdə olarkən supermarketlərdən birinin parkinqindən “Audi Q3” markalı 99-SK-699 dövlət qeydiyyat nişanlı avtomobil əsas yola çıxıb. Mən avtobusu sola çəkərək hərəkətimə davam etdim, lakin həmin avtomobili idarə edən qadın sürücü yola çıxaraq məni sıxdı və qəfil önümə keçməyə çalışdı, bu zaman yüngül toqquşma oldu”, – sürücü deyib.
O deyir ki, mümkün dərəcədə qəzadan yayınmağa çalışsa da, toqquşma qaçılmaz olub.
“Yol polisi yaxınlıqda idi, sənədlərimizi aldı və Bakı Şəhər Yol Polisi İdarəsinə gəlməyimizi, eyni zamanda sığortanı gözləməyimizi bildirdi. Dayanıb sığortanı gözləyərkən 3 nəfər naməlum şəxs oraya yaxınlaşdı, “Audi”dəki xanımla danışaraq yüksək səslə məni təhqir etməyə başladılar, ünvanıma nalayiq sözlər işlətdilər və onlardan biri gözümə yumruqla zərbə vurdu. Nəticədə dişim sındı. Onlar isə “Toyota Land Cruiser” markalı avtomobilə minərək ərazidən uzaqlaşdılar”, – deyə sürücü davam edib.
Hadisə ilə bağlı sürücü polisə müraciət edib.
Daxili İşlar Nazirliyindən bildirildi ki, məsələ ilə bağlı araşdırma gedir. Müvafiq ekspertizalar təyin edilib və ekspertiza rəyinə uyğun olaraq əmələ hüquqi qiymət veriləcək.
