Sabunçu rayonunda tikintidə fəhlənin ölümünə səbəb olan şəxs həbs edilib. Bu haqda 13 iyul tarixində Report məlumat verib.
Nardaran qəsəbəsi, Ləhic bağları yaşayış massivində fərdi evdə fəhlə işləyən Vasif Bayramov iyulun 6-da xəsarət alaraq xəstəxanaya yerləşdirilib. Daha sonra, iyulun 10-da o, aldığı xəsarətlərdən xəstəxanada dünyasını dəyişib.
Polis tərəfindən araşdırma aparılıb və məlum olub ki, zərərçəkmişlə bir yerdə fəhlə işləyən Əlvan Hüseynov şəxsi münasibətlər zəminində aralarında düşən dava zamanı Vasif Bayramovu itələyib. Bayramov isə yerə yıxılaraq başı daşa dəyib.
Faktla bağlı Cinayət Məcəlləsinin “Qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda” maddəsi ilə cinayət işi başlanıb. Məhkəmənin qərarı ilə Əlvan Hüseynova qarşı həbs qətimkan tədbiri seçilib. Hazırda cinayət işi üzrə zəruri istintaq hərəkətləri davam etdirilir.
