Səbail rayonu, Litvin Babayev küçəsində axşam saatlarında tabesizlik göstərən sürücü sonda ələ keçib. Bu haqda BakuPlus.az BAKU.WS-ə istinadən bu gün, 30 sentyabr tarixində xəbər verir.
“Mercedes-Benz” markalı yük maşınının sürücüsü polisin “saxla” əmrinə tabe olmayaraq yolda zəncirvari qəzanın yaşanmasına səbəb olub. Yük maşını polis əməkdaşları tərəfindən silahdan atəş açılaraq saxlanılıb.
Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli açıqlamasında bildirib ki, hadisə dünən gecə saatlarında baş verib:
“1983-cü il təvəllüdlü, əvvəllər məhkumluq həyatı yaşamamış Səbail rayon sakini Muradov Yaşar Əli oğluna idarə etdiyi yük avtomobili ilə yolayrıcını keçmə qaydasını pozduğuna görə Səbail Rayon Dövlət Yol Polisi Şöbəsinin əməkdaşları tərəfindən “saxla” əmri verilib. Onu da qeyd edim ki, polisə tabesizlik göstərərkən yaxınlıqdakı 5 avtomobilə ziyan vurub. Bu səbəbdən yol polisi əməkdaşları şəxsin saxlanılması üçün silahdan istifadə etmək məcburiyyətində qalıblar.
Atəşlə avtomobilin arxa təkərlərini partladıblar və sürücünü saxlayıblar. Saxlanılarkən şəxsin anlaqsız vəziyyətdə, sərxoş olduğu məlum olub. Ondan kəskin spirt qoxusu gəlib. O, yol polisinə tabe olmadığı üçün əraziyə dəstək üçün post patrul xidmətinin əməkdaşları cəlb ediliblər.
Şəxs saxlanıldıqdan sonra həkim müayinəsinə aparılıb. Məlum olub ki, o, nəinki alkoqollu içkinin təsiri altındadır, həm də narkotik vasitə qəbul edib”.
