Suraxanı Rayon Məhkəməsinin inzibati binasını yandırmağa cəhd edən şəxs 7 il 6 ay müddətinə azadlıqdan məhrum edilib. Bu haqda bu gün, 11 noyabr tarixində Qafqazinfo məlumat verib.
35 yaşlı Nurlan Quliyev (soyadı şərti) həmin əməlini ötən il iyulun 29-da saat 23:00 radələrində törədib. O, qanunsuz olaraq binanın mühafizə olunan zonasına daxil olaraq əvvəlcədən hazırladığı xüsusi avadanlıqla məhkəmə binasına bitişik plastik zibil qabını yandırıb. Quliyev inzibati binanın fasadının yanar materialdan olduğunu bildiyi üçün bu addımı atıb.
Zibil qabı alovlandıqdan sonra o, hadisə yerini tərk edib. Amma həmin gecə yağan yağış yanğını söndürüb. Bir müddət sonra hadisə yerinə qayıdan Nurlan binanın yanmadığını görüb və bu dəfə özü ilə gətirdiyi kəlbətinlə binaya gedən işıq kabellərini kəsib.
Proses zamanı məlum olub ki, Nurlanın Suraxanı Rayon Məhkəməsinin əməkdaşları ilə heç biri ilə problemi olmayıb. Həmçinin ona qarşı heç bir məhkəmə prosesi olmayıb və yaxud haqsızlıq edilməyib.
Nurlan Quliyev bunu hər hansı bir məhkəmənin yekun hökm verməsinə qarşı olduğuna görə etdiyini bildirib. 2014-cü ildən dinə maraq göstərdiyini bildirən Nurlan İslam qanunlarından başqa heç bir qanun qəbul etmədiyini qeyd edib.
2021-ci ildə istifadəyə verilən məhkəmə binasının içərisindəki invertarlarla birlikdə ümumi dəyəri 9 milyon 897 min 829,53 manatdır.
