Bakıda məktəbin qarşısında narkotik vasitənin dövriyyəsi ilə məşğul olan 20 yaşlı Günay Quliyevanın (ad-soyad şərtidir) məhkəmə prosesi başa çatıb. Bu haqda 29 sentyabr tarixində Qafqazinfo.az məlumat verib.
Bakı Ağır Cinayətlər Məhkəməsində CM-in 234.4.1-ci və 234.4.3-cü maddələri ilə təqsirləndirilən G.Quliyeva 6 il müddətinə azadlıqdan məhrum edilib.
Belə ki, Binəqədi rayonunda kirayədə yaşayan Quliyeva 2021-ci ilin noyabr ayında əməliyyat nəticəsində saxlanılıb və onun üzərində 4,179 qram kustar üsulla hazırlanmış heroin, 11 ədəd həbdə metadon tərkibli dərman preparatları aşkar edilib.
Araşdırma zamanı Günay Binəqədi qəsəbəsindəki 179 saylı tam orta məktəbin qarşısında dayanmaqla 7-8-ci sinif şagirdlərinə narkotik maddəni əvvəlcə konfet adı ilə pulsuz verdiyini, onlarda asılılıq yarandıqda isə hər bir həbi 15-20 manata satdığını bildirib. O, bu səbəbdən hətta uşaqların valideynləri tərəfindən döyüldüyünü də qeyd edib.
Quliyeva bir müddət əvvəl qeyri-rəsmi nikah münasibətində olduğu ərindən ayrılıb, onun 2 yaşlı qızı var.
