Bakının Binəqədi rayonu, Cəfər Xəndan küçəsində yerləşən “Boom pub ws grill” kafesində kütləvi dava olub. Bu haqda bu gün, 1 fevral tarixində Qafqazinfo məlumat verib.
İnsident iki qrup arasında yaranmış mübahisəyə görə baş verib. Davada ABŞ vətəndaşı olan 26 yaşlı K.Almarin, 35 yaşlı B.Şarrod, Nigeriya vətəndaşları - Bakı Biznes Universitetinin tələbəsi F.Olvvseum, Avrasiya Universitetinin tələbələri A.Arakuekvas, C.Mokvvenei, “Raymont Dirçəliş” futbol klubunun oyunçusu A.Gofsfime, Naxçıvan Dövlət Universitetinin tələbəsi B.Onyekuçaku iştirak ediblər.
Nəticədə K.Almarin və C.Mokvvnei aldıqları xəsarətlərlə xəstəxanaya aparılıblar. Onlara ilkin tibbi yardım göstərildikdən sonra hər iki şəxs evə buraxılıb.
Verilən məlumata görə, Amerikadan gələn kişilər basketbolçudurlar. Onlar ötən il basketbol klubunda oynamaq üçün Azərbaycana gəliblər.
Faktla bağlı Binəqədi RPİ-nin 7-ci Polis Bölməsində araşdırma aparılır.
