Bakının Sabunçu rayonu, Kürdəxanı qəsəbəsində qeydə alınmış yol qəzasında həlak olan Fəxri Umudovun həyat yoldaşının intiharı ilə bağlı bəzi təfərrüatlar üzə çıxıb. Bu haqda bu gün, 14 oktyabr tarixində APA TV məlumat verib.
34 yaşlı Nahidə Umudova Kürdəxanı qəsəbəsində yaşadığı evin həyətindəki qaz borusundan özünü asıb. İntihardan əvvəl o, həyat yoldaşının telefonuna “Mən sənsiz qala bilmərəm” mesajı yazıb.
Umudovlar 18 il evli olublar. 2 il əvvəl onların övladı dünyaya gəlib. Nahidə intihar etməzdən öncə bacısının adına vəsiyyətnamə yazıb və övladını ona əmanət edib. Bildirilir ki, Umudovanın bacısının da övladı olmayıb.
Qəza hadisəsi 10 oktyabr, saat 17:20-də Kürdəxanı şosesi, Əjdər Məlikov küçəsində, “Nail Market”in qarşısında baş verib. “Chevrolet” markalı avtomobili idarə edən Sumqayıt şəhər sakini, 23 yaşlı İlkanə Əhmədova sükana nəzarəti itirib. Nəticədə o, yolun kənarında dayanan "Mitsubishi" markalı avtomobilə çarpılıb. Zərbənin gücündən “Mitsubishi” hərəkətdə olan “Audi” markalı avtomobillə toqquşub.
Qəza nəticəsində “Mitsubishi”nin sürücüsü, 38 yaşlı Fəxri Umudov hadisə yerində keçinib. Faktla bağlı araşdırma aparılır.
