Bakı şəhərində narkotik vasitələrin satışını və paylanmasını təşkil edən İran vətəndaşı saxlanılıb. Bu haqda BakuPlus.az bu gün, 27 sentyabr tarixində DİN-in mətbuat xidmətinə istinadən xəbər verir.
Binəqədi polisi paytaxt ərazisinə qaçaqmalçılıq yolu ilə gətirilən külli miqdarda narkotik vasitələrin satışını və paylanmasını təşkil edən İran vətəndaşı Hossein Bolhassanini tutaraq istintaqa təqdim edib.
Onun üzərinə və Suraxanı rayonu, Hövsan qəsəbəsində yaşadığı evə baxış zamanı 3 kiloqram heroin və 5 kiloqramdan artıq marixuana aşkar olunaraq götürülüb. Onun narkotik vasitələrin satışını həyata keçirmək üçün paytaxt ərazisində yaratdığı şəbəkənin digər üzvlərinin saxlanılması istiqamətində əməliyyat-axtarış tədbirləri davam etdirilir.
Faktla bağlı Binəqədi Rayon Polis İdarəsində Cinayət Məcəlləsinin müvafiq maddəsi ilə cinayət işi başlanılıb.
Saxlanılan şəxs barəsində məhkəmənin qərarı ilə həbs qətimkan tədbiri seçilib.
