Bakının Binəqədi rayonunda yol hərəkəti qaydalarını kobud şəkildə pozduğuna görə saxlanılan sürücünün sərxoş vəziyyətdə olduğu məlum olub. Bu haqda 9 oktyabr tarixində Avtosfer.az məlumat verib.
Binəqədi rayon Dövlət Yol Polisi Şöbəsinin əməkdaşları 77-CL-059 qeydiyyat nişanlı "Mercedes" markalı avtomobilin sürücüsünü saxlayıblar. Avtomobili idarə edən İlqar Qurbanov sərxoş vəziyyətdə olub, lakin sərxoşluq müayinəsindən keçməkdən imtina edərək polisin qanuni tələblərinə tabe olmayıb. Hadisə yerinə Post Patrul Xidməti (PPX) cəlb olunub. PPX əməkdaşlarının köməkliyi ilə o, tibbi müayinəyə aparılıb. Həkim müayinəsi zamanı onun sərxoş olduğu təsdiqlənib.
İlqar Qurbanov Binəqədi rayon Məhkəməsinin qərarı ilə 7 gün müddətinə inzibati qaydada həbs edilib.
Verilən məlumata görə, Qurbanov Dövlət Neft Şirkətinin H.Əliyev adına Neft Emalı Zavodunun, Xam neftin emalı üzrə 2 nömrəli istehsalatın rəis müavinidir.
