Paytaxt ərazisində saxta spirtli içkilərin satışı ilə məşğul olan dəstə üzvləri saxlanılıblar. Bu haqda bu gün, 8 may tarixində Bakuplus.az Daxili İşlər Nazirliyinə (DİN) istinadən xəbər verir.
Polis əməkdaşlarının keçirdikləri tədbir nəticəsində Masazır qəsəbəsində gizli sexdə saxta spirtli içkilər hazırlayan Mikayıl Abbasov və onun rəhbərlik etdiyi dəstənin üzvləri – Fərid Məmmədov, Fərid Haqverdiyev, Əhməd Mikayılov, Mehman Cəfərov və Nurlan Zamanov saxlanılıblar.
Onlar kustar üsulla spirtli içkilər hazırlayaraq paytaxt ərazisində satırdılar. Bu əməldə onlara Azər Əsgərov, Rüstəm Qədirli və Ramin Mirzəxanov kömək edirdilər. Həmin şəxslərin də tutulduqları bildirilir.
Baxış zamanı dəstə üzvlərinə məxsus sex, anbar və mağazalarda xeyli sayda müxtəlif əmtəə nişanları altında qablaşdırılmış saxta spirtli içkilər, yerli və xarici əmtəə nişanı etiketləri, qapaqlar, qidada istifadəsi nəzərdə tutulmayan texniki spirt aşkarlanıb.
Təyin edilən ekspertizalar zamanı spirtli içkilərin tərkibinin standartlara uyğun gəlmədiyi və insan sağlamlığı üçün ciddi təhlükə yaratdığı məlum olub.
Faktla bağlı araşdırmalar davam etdirilir.
