Bakıda sevgilisinə ağır xəsarətlər yetirən, ona qarşı müxtəlif alçaldıcı xarakterli hərəkətlər edərək videoya çəkən gənc həbs olunub. Bu haqda bu gün, 22 iyun tarixində Bakuplus.az Qafqazinfo-ya istinadən məlumat verir.
Neftçala sakini, 21 yaşlı Əli Məmmədov TikTok sosial şəbəkəsində Sumqayıt şəhər sakini Aysu (adı dəyişdirilib) ilə tanış olub və onlar arasında sevgi münasibəti yaranıb. Bir müddət sonra qızın hamilə olduğu üzə çıxıb. Daha sonra onların münasibətləri pozulub və Əli qısqanclıq zəminində keçmiş sevgilisini cəzalandırmaq qərarına gəlib.
Məmmədov Aysunu dostunun evinə apararaq ona ağır xəsarətlər yetirib. Həmçinin qıza qarşı seksual xarakterli zorakılıq hərəkətləri edərək videoya çəkib. Bundan sonra qızı digər yerə apararaq onu orada 4 gün ərzində saxlayıb. Bildirilir ki, o, qızı amansızlıqla döyməyə və təhqir etməyə davam edib. Bütün cinayətlərini Məmmədov lentə alıb.
Beş gündən sonra qızından xəbər almayan anası polisə müraciət edib. Məmmədovun və qızın yerini müəyyən edərək polis əməkdaşları gənci saxlayıblar. Onun telefonunda qıza qarşı etdiyi hərəkətləri əks etdirən 4 video aşkar edilərək istintaq materiallarına daxil edilib. Verilən məlumata görə, aldığı xəsarətlərdən Aysu bətnindəki övladını da itirib.
Bakı Ağır Cinayətlər Məhkəməsinin ötən həftə çıxardığı hökmlə Ə.Məmmədov Cinayət Məcəlləsinin “Əzab vermə - hamilə və köməksiz vəziyyətdə olan şəxsə qarşı işgəncə verməklə törədildikdə, xüsusi amansızlıqla seksual xarakterli zorakılıq hərəkətləri” maddəsi ilə təqsirli bilinib. Ona 7 il həbs cəzası verilib.
Proses zamanı məlum olub ki, Məmmədov 2022-ci ildə də ağır cinayət törədib. Qəsdən sağlamlığa ağır zərər vurma maddəsi ilə təqsirli bilinən gənc ilk dəfə cinayət törətməsi, yaşı və digər hallar nəzərə alınmaqla sınaq müddəti verilməklə şərti cəza alıb.
