Paytaxtın Binəqədi, Xətai və Nizami rayonlarında çoxsaylı oğurluq əməllərində şübhəli bilinən şəxs həbs olunub. Bu haqda bu gün, 13 oktyabr tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Oğurluqları törətməkdə şübhəli bilinən əvvəllər dəfələrlə məhkum olunmuş 27 yaşlı İsmayıl Qəhrəmanovun cinayət işinin istintaqı Bakı şəhər Baş Polis İdarəsində aparılır.
Daha öncə məlum olub ki, silsilə oğurluqlarda şübhəli bilinən İsmayıl Qəhrəmanov saxlanılıb.
Saxlanma zamanı qaçışa cəhd etməsinə və qeyri-adekvat davranışlarına görə Qəhrəmanov narkoloji müayinədən keçirilib və onun narkotik vasitə qəbul etdiyi müəyyən olunub.
İstintaq zamanı məlum olub ki, Qəhrəmanov Bakı şəhərində yetkinlik yaşına çatmadığı dövrdə 96 oğurluq törətdiyinə görə məhkəmə qarşısına çıxarılaraq 10 il müddətinə azadlıqdan məhrum edilib.
Məhkəmədəki çıxışında onun polis əməkdaşları tərəfindən döyülməsi və təzyiqlər edilməsi ilə bağlı iddiaları üzrə xidməti araşdırma başlayıb.
