Daxili İşlər Nazirliyinin mətbuat xidməti Bakıda oğurluq əməlində şübhəli bilinən şəxsin 36-cı Polis Bölməsində döyülməsi iddiaları ilə bağlı açıqlama verib. Bu haqda bu gün, 11 oktyabr tarixində Bakuplus.az məlumat verir.
Bakının Xətai rayonunda mənzillərin birindən oktyabrın 10-da 50 manat pul, 450 manat dəyərində gümüş bəzək əşyaları, 1000 rus rublunun oğurlanması barədə polisə məlumat daxil olub. Əməliyyat-axtarış tədbirləri nəticəsində hadisənin baş verdiyi ərazidə quraşdırılan kameralara oğurluq əməlinin əvvəllər dəfələrlə məhkum olunmuş 27 yaşlı İsmayıl Qəhrəmanov tərəfindən törədilməsi müəyyən edilib və o saxlanılıb.
Saxlanma zamanı onun idarə etdiyi "BMW" markalı avtomobildən oğurlanan əşyalar, həmçinin digər mənzildən oğurladığı qızıl boyunbağı aşkar olunaraq götürülüb. Həmçinin məlum olub ki, o, Binəqədi rayonu ərazisində də 2 mənzildən oğurluq edib.
Saxlanma zamanı qaçışa cəhd etməsinə və qeyri-adekvat davranışlarına görə Qəhrəmanov narkoloji müayinədən keçirilib və onun narkotik vasitə qəbul etdiyi müəyyən olunub.
Lakin o, məhkəmədən buraxıldıqdan sonra məhkəmənin qərarından rayon prokurorluğu ilə birgə yuxarı instansiyaya apellyasiya şikayəti verib. İ.Qəhrəmanov Xətai RPİ-nin İstintaq şöbəsinə gətirilib və əməli törətməkdə şübhəli şəxs qismində saxlanılıb.
İstintaq zamanı məlum olub ki, Qəhrəmanov Bakı şəhərində yetkinlik yaşına çatmadığı dövrdə 96 oğurluq törətdiyinə görə məhkəmə qarşısına çıxarılaraq 10 il müddətinə azadlıqdan məhrum edilib.
2019-cu ildə azadlığa buraxıldıqdan sonra o, 2021-ci ilin dekabrında Binəqədi rayonu ərazisində mənzildən külli miqdarda oğurluq etdiyinə görə həbs olunub və barəsində cinayət işi Bakı Ağır Cinayətlər Məhkəməsinə göndərilib. Lakin məhkəmə istintaqı zamanı Qəhrəmanov barəsində seçilmiş həbs qətimkan tədbiri dəyişdirilib və o, məhkəmə zalından buraxılıb. Hazırda həmin iş üzrə də məhkəmə istintaqı davam etdirilir.
Məhkəmədəki çıxışında onun polis əməkdaşları tərəfindən döyülməsi və təzyiqlər edilməsi ilə bağlı iddiaları üzrə xidməti araşdırma başlayıb. Nəticəsindən asılı olaraq, bu məsələyə də hüquqi qiymət veriləcək.
