Bakının Xəzər rayonu, Buzovna qəsəbəsində bu gün, 29 sentyabr saat 03:00 radələrində 50 yaşlı Valeh Qədəşov qətlə yetirilib. Bu haqda Bakuplus.az Azərbaycan Respublikası Baş Prokurorluğunun mətbuat xidmətinə istinadən məlumat verir.
Valeh Qədəşovun üzərində xəsarət izi olan meyiti yaşadığı evdən 30-40 metr uzaq məsafədə küçədə aşkar edilib.
Prokurorluq və polis orqanlarının əməkdaşları tərəfindən həyata keçirilmiş istintaq-əməliyyat tədbirləri nəticəsində paytaxtın Xəzər rayonu ərazisində qeyri-aşkar şəraitdə törədilmiş ağır cinayətin üstü “isti izlər”lə açılıb. Mərhumun qardaşı oğlu, 33 yaşlı Şahin Qədəşovun aralarında şəxsi münasibətlər zəminində yaranmış mübahisə zamanı Valeh Qədəşova bıçaqla xəsarət yetirərək onu qəsdən öldürməsi barədə əsaslı şübhələr müəyyən edilib.
Faktla bağlı Xəzər Rayon Prokurorluğunda “Qəsdən adam öldürmə” maddəsi ilə cinayət işi başlanılıb. Qədəşov şübhəli şəxs qismində saxlanılıb. İstintaq davam etdirilir.
