Nəsimi rayonu, Vladislav Plotnikov küçəsi, 8 ünvanında yerləşən binanın sakinləri binanın qəzalı vəziyyətdə olmasından şikayətlənirlər. Yerli sakinlərin sözlərinə əsasən, “Maşınqayırma MTK”-nın tikdirdiyi blokun qapısının şüşəsinin sınması övladlarının həyatı üçün təhlükə yaradıb. Bu haqda bu gün, 18 iyul tarixində Bakuplus.az Qafqazinfo-ya istinadən məlumat verir.
Analoji hadisə bir neçə gün əvvəl də qeydə alınmışdı. Azyaşlıların üzərinə düşən şüşə qırıqları uşaqlara xəsarət yetirib: “Uşaqlar blokun qarşısında oynayırmışlar. Hadisə də elə bu vaxt baş verib. Qapını açmaq istəyəndə üst hissəsindəki qırıq şüşələr onların üstünə tökülüb. Nəticədə də uşaqların alın və qol nahiyələrində belə kəsiklər yaranıb. Şüşə uşaqların başına düşsə, xilas edə bilməzdik. Bundan başqa, oradan daha az yaşı olanlar, 2-3 yaşlı uşaqlar keçsəydilər, bu zərbəyə dözə bilməzdilər. Birinin başına düşsə, elə oradaca qalar. Müraciətlərimizə də baxan yoxdur”.
Məsələ ilə bağlı “Maşınqayırma MTK” problemin aradan qaldırıldığını bildirib: “Qırılmış şüşələr oradan yığışdırılıb. Amma onu da deyək ki, o uşaqlar həmin ünvanda yaşamırlar, çox nadincdirlər. Dəfələrlə onlara demişik ki, tikinti olan əraziyə getməsinlər. Valideynlərinə də xəbərdarlıq etmişik. Topla vurub qonşuların şüşələrini də qırırlar. Hər halda bu təhlükəli vəziyyət idi və həll etdik”.
“Maşınqayırma MTK” daha öncə də şikayətlərə səbəb idi. Şirkətin ərazisində tikinti işləri aparıldıqdan sonra ətraf mühit təmizlənməyib. Yığılmış tullantılar da yanğına səbəb olub.
[caption id="attachment_144099" align="alignnone" width="637"]
Foto Qafqazinfo.az[/caption]
