Binəqədi rayonunda baş verən partlayışla bağlı TƏBİB, Fövqəladə Hallar Nazirliyi və Rayon Prokurorluğu məlumatlar yayıb. Bu haqda BakuPlus.az bu gün, 4 mart tarixində Report-a istinadən məlumat verir.
Rayon prokurorluğuna Binəqədi ərazisində yerləşən təkər təmiri sexində 41 yaşlı Pərviz Dadaşovun ölməsi barədə məlumat daxil olub. Hadisənin hava təzyiqi ilə işləyən cihazın partlaması nəticəsində baş verməsinə əsaslı şübhələr müəyyən edilib.
Bu gün saat 10:12 radələrində Bakı Şəhəri Təcili və Təxirəsalınmaz Tibbi Yardım Stansiyasına çağırış daxil olub. Xəsarət alan şəxs Respublika Klinik Xəstəxanasına təxliyə edilib. İlkin tibbi yardım göstərildikdən sonra müayinələrdən imtina edib. O, ambulator müalicə üçün evə buraxılıb.
FHN-in Dövlət Yanğından Mühafizə xə Xüsusi Riskli Xilasetmə xidmətlərinin qüvvələri əraziyə cəlb edilib. Hadisənin 32 kv.m sahəsi olan təkər təmiri sexində kustar üsulla hazırlanmış hava kompressorundakı partlayış nəticəsində baş verdiyi müəyyən olunub. Partlayış dalğasının təsirindən sexin dam örtüyü dağılıb. Sexdə işləyən 1 nəfər aldığı müxtəlif bədən xəsarətlərindən hadisə yerində dünyasını dəyişib.
