Bakıda binada yanğın olub, 12 nəfər təxliyə edilib. Bu haqda 16 noyabr tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən xəbər verir.
Bu gün günorta saatlarında Binəqədi rayonu, M.Ə.Rəsulzadə qəsəbəsində yerləşən çoxmərtəbəli yaşayış binasında yanğın baş verib. Hadisə yerinə Dövlət Yanğından Mühafizə və Xüsusi Riskli Xilasetmə xidmətlərinin qüvvələri cəlb olunub.
Məlum olub ki, yanğın yaşayış binasının 13-cü mərtəbəsində yerləşən üçotaqlı mənzildə baş verib və ümumi sahəsi 90 kv.m olan mənzilin mətbəx-zalının döşəməsi 6 kv.m sahədə, 1 ədəd pəncərə çərçivəsi və ev əşyaları 27 kv.m sahədə yanıb.
Belə ki, xüsusi təyinatlı texnikanın - avtonərdivanın operativ tətbiqi sayəsində yanğının genişlənməsinə imkan verilmədən qısa müddətdə söndürülməsi və bina sakinlərinin təxliyəsi təmin olunub. FHN-in qüvvələri tərəfindən 2-si uşaq olmaqla 12 nəfər təxliyə olunub.
Mənzilin qalan hissəsi və qonşu mənzillər yanğından mühafizə olunub.
