Həyat yoldaşını övladının yanında 17 bıçaq zərbəsi ilə qətlə yetirən Elçin Ələkbərovun cinayət işi üzrə məhkəmə prosesi başa çatıb. Bu haqda 8 oktyabr tarixində Bakuplus.az Bakutv-yə istinadən xəbər verir.
Ötən ilin iyul ayında Binəqədi rayonunda Özbəkistan vətəndaşı, 42 yaşlı Elçin Ələkbərov şəxsi münasibətlər zəminində aralarında yaranan mübahisə zamanı keçmiş həyat yoldaşı, 47 yaşlı Nailə Əliyevanı bıçaqlayaraq öldürüb.
Məhkəmə zamanı məlum olub ki, birgə yaşadıqları dövrdə aralarında tez-tez baş verən mübahisələrə görə Nailə Əliyeva dəfələrlə polisə və məhkəmələrə şikayət edib. Elçin Ələkbərov inzibati və cinayət məsuliyyətlərinə cəlb edilib. O, 2021-ci il iyulun 30-da Nailə Əliyevanın yenidən polisə şikayət etdiyini eşidib və qadını öldürmək qərarına gəlib. Niyyətini həyata keçirmək üçün Gəncədən Bakıya gəlib. Marketdən iki ədəd bıçaq alıb və Xırdalanda yerləşən kafeyə gedib. Nailənin oğlu Aydınla birlikdə ev istiqamətində getdiklərini görüb və onları təqib edib. Sonra yolda Nailə Əliyevanın saçlarından tutub, başını yerdə olan daşa vurub. Bıçaqlardan birini sağ əlinə götürəndə, oğlu ona mane olmaq istəyib. Uşağı itələyərək, yerə yıxıb və onun gözləri qarşısında Nailə Əliyevaya çoxsaylı xəsarətlər yetirib. Beləliklə, Elçin Ələkbərov onu həyatdan məhrum edib.
Məhkəmə iclasında Elçin Ələkbərov ittiham üzrə özünü təqsirli bilməyib. O, CM-in “Qəsdən adam öldürmə” maddəsi ilə 18 il müddətinə azadlıqdan məhrum olunub.
