Bakı şəhərində sürücü ilə yol polisi arasında baş verən insidentin görüntüləri yayılıb. Bu haqda BakuPlus.az Oxu.az-a istinadən bu gün, 20 sentyabr tarixində xəbər verir.
Yol polisi əməkdaşı paytaxt ərazisində yol hərəkəti qaydalarını pozan sürücünü saxlayaraq sənədlərini tələb etsə də, o, buna əməl etməyib.
Nəticədə polislə sürücü arasında mübahisə yaranıb.
Sosial şəbəkələrdə yayılan görüntülər barədə Bakı Şəhər Dövlət Yol Polisi İdarəsinin baş inspektoru, polis mayoru Araz Əsgərli açıqlamasında bildirib ki, hadisə Axundov bağının yaxınlığında qeydə alınıb:
“Sürücü avtomobilini hərəkətin sıx olduğu bir yerdə qanunsuz olaraq park edib. Həmin vaxt DYP-nin əməkdaşları avtomobilin oradan götürülməsi üçün sürücüyə xəbərdarlıq ediblər. Sürücü əməkdaşların qanuni tələbinə tabesizlik nümayiş etdirib və İnzibati Xətalar Məcəlləsinin müvafiq maddələri ilə onun barəsində tədbir görülüb”.
“Əgər sıxlıqdan, tıxacdan narazılıq ediriksə, qaydalara əməl etməyənləri cəmiyyət olaraq ictimai qınaq obyektinə çevirməliyik. Hər hansı videonu çəkib, daha sonra özünə haqq qazandırmaq istəyi və narazı görüntüsü yaratmaq naminə ictimai fikrə təsir etmək məqsədi güdərək qanun keşikçisinin işinə kölgə salmaq niyyətini, yəqin ki, düşüncəsi olan hər bir adam düzgün qiymətləndirəcək”, - deyə o əlavə edib.
