Qaradağ rayonu, Puta qəsəbəsi, 8 saylı cəzaçəkmə və İxtisaslaşdırılmış müalicə müəssisələrinə narkotik və psixotrop maddələrin keçirilməsi cəhdlərinin qarşısı alınıb. Bu haqda 29 sentyabr tarixində Penitensiar xidmətinin mətbuat xidməti məlumat verib.
Cinayət Məcəlləsinin “Quldurluq külli miqdarda əmlak əldə etmək məqsədi ilə törədildikdə” maddəsi ilə təqsirli bilinərək 13 il 6 ay müddətinə azadlıqdan məhrum edilmiş məhkum Əfləddin Muradova qohumu, Abşeron rayon sakini Rövşən Xasayev tərəfindən gətirilmiş sovqata baxış keçirilib. Baxış zaman makaronun içərisində xüsusi üsulla gizlədilmiş ümumi çəkisi 1,333 qram heroin və ümumi çəkisi 0,458 qram metamfetamin aşkar edilib.
Həmçinin 1 il müddətinə azadlıqdan məhrum edilmiş və hazırda İxtisaslaşdırılmış müalicə müəssisəsində saxlanılan məhkum Niyazi Səfərov ilə qısamüddətli görüşə gəlmiş anası, Bərdə rayon sakini Gündüzə Həsənovanın üzərində və gətirilmiş sovqata baxış keçirilən zaman ona məxsus pul kisəsinin içərisində gizlədilmiş ümumi çəkisi 0,139 qram çətənə (kannabis) bitkisinin toxumları aşkar edilib.
Hər iki faktla bağlı araşdırma aparılır.
