Oğuzda polis əməkdaşları tərəfindən keçirilən tədbirlər nəticəsində xaricdə yaşayan narkotacirlər tərəfindən narkokuryerliyə cəlb edilən şəxslər saxlanılıblar. Bu haqda bu gün, 23 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Görülmüş tədbirlər nəticəsində Mingəçevir şəhər sakini, əvvəllər də narkotik vasitələrin qanunsuz dövriyyəsi ilə məşğul olduğu üçün məhkum olunmuş Cavid Babayev saxlanılıb.
Baxış zamanı ondan 1 kiloqram 525 qram qurudulmuş marixuana, 175 qram tiryək, metamfetamin, “AK-74” markalı avtomat, 28 patron və 2 daraq aşkarlanıb.
Araşdırma zamanı, həmçinin məlum olub ki, Babayev tanışı, özünü Ramal kimi təqdim edən Səxavət Camalzadənin təklifi əsasında Oğuz rayonuna gəlib və 1000 manat qarşılığında ona deyilən ərazidən həmin bağlamanı Bakıya aparmağa razılaşıb.
Davam etdirilən tədbirlərlə Camalzadə də şübhəli şəxs qismində saxlanılıb. O, ifadəsində sosial şəbəkədə tanış olduğu xarici ölkədə yaşayan narkotacir tərəfindən həmin narkotik vasitənin və odlu silahın Oğuzdan paytaxta çatdırılması təklifi aldığını, həmin təklifi də Mingəçevir şəhərində yaşayan Babayevə yönləndirdiyini etiraf edib.
Faktla bağlı cinayət işi açılıb, istintaq tədbirləri davam etdirilir.
[caption id="attachment_127203" align="alignnone" width="640"]
Foto DİN-nin mətbuat xidməti[/caption]
