Nəsimi rayonunda növbəti “ABAD” həyət istifadəyə verilib. Bu haqda bu gün, 6 may tarixində Bakuplus.az Qafqazinfo-ya istinadən xəbər verir.
Cavadxan küçəsi, 36 və H.B.Əliyev küçəsi ünvanlarında, 500-dən artıq sakinin yaşadığı binaları əhatə edən ərazidə əsaslı abadlıq işləri aparılıb.
Yenidənqurma işləri çərçivəsində binaların fasadı və dam örtüyü əsaslı təmir edilib, yeni yağış suları axıdan boru və navalçalar quraşdırılıb, 8 ədəd giriş qapısı və 32 ədəd pilləkən qəfəsinin pəncərələri dəyişdirilib. Uşaq və əlil arabaları üçün panduslar quraşdırılıb. Həyətə asfalt, tamet daşları vurulub, qazon salınıb.
Zəbt olunmuş sahələr sakinlərin ümumi istifadəsinə qaytarılıb, kiçik tullantılar üçün zibil qutuları qoyulub. Sahibsiz ev heyvanları üçün damlar və quş yuvaları quraşdırılıb. Həmçinin söhbətgah və oturacaqlar qoyulub, müxtəlif növ uşaq oyun elementləri və idman qurğuları quraşdırılıb.
Məhəllədə yeni yaşıllıq zolağı salınıb, mövcud yaşıllıqlara və ağaclara aqrotexniki qaydada qulluq göstərilib, 100 ədəd şam ağacı, 1000 ədədə yaxın mövsümi çiçək və 450-dən artıq müxtəlif növ həmişəyaşıl kollar əkilib.
Həyətdə 4 nöqtədə işıqlandırma sistemləri və 3 nöqtədə təhlükəsizlik kameraları quraşdırılıb. Avtomobillər üçün parklanma yerləri yaradılıb.
