Bakıda iş yoldaşı olan xanımın adına çoxsaylı saxta profillər açan 35 yaşlı şəxs həbs edilib. Bu haqda BakuPlus.az Qafqazinfo-ya istinadən bu gün, 24 oktyabr tarixində xəbər verir.
Nərimanov rayonu ərazisində fəaliyyət göstərən özəl şirkətdə çalışan Rauf Səmədli iş yoldaşı Fərizə Qəribovanın adına Facebook-da bir neçə saxta profil açdığına görə saxlanılıb.
R. Səmədli bu əməlinə belə haqq qazandırıb: “Onu sevdiyim üçün qısqanırdım. Aramızdakı anlaşılmazlıq da bu səbəbdən olub. Etdiyim əməldən peşmanam”.
Məhkəmə iclasında F.Qəribova Raufun onu bezdirdiyini bildirib: “Əvvəllər tanıdığım və birlikdə işlədiyim şəxs mənim şəkillərimi və mobil nömrəmi sosial şəbəkələrdə müxtəlif saxta profillər açaraq istifadə edib, nalayiq ifadələrlə məni və ailəmi təhqir edib. Buna dair dəfələrlə xəbərdarlıq etməyimə baxmayaraq, icazəm olmadan şəkillərimi paylaşaraq əxlaqsız kimi təqdim edib. Hətta məni bir neçə dəfə vurub. Hazırda şikayətçiyəm”.
Hakim Gültəkin Əsədovanın sədrliyi ilə keçirilən iclasda Rauf Səmədliyə 10 sutka inzibati həbs cəzası verilib və o, müvəqqəti saxlanma məntəqəsinə göndərilib.
