Qaradağda iki nəfərin ölümünə səbəb olmaqda təqsirləndirilən şəxs məhkəmə qarşısına çıxıb. Bu haqda 15 sentyabr tarixində APA məlumat verib.
İki nəfərin ölümünə səbəb olmaqda təqsirləndirilən İbrahim Əsədzadənin cinayət işi üzrə məhkəmə prosesi başa çatıb. Hökmə əsasən, İbrahim Əsədzadə 10 il müddətinə azadlıqdan məhrum edilib.
Belə ki, Qaradağ rayonunda bu il aprelin 27-si saat 03:15 radələrində 55 yaşlı Səyavuş Cəfərov və 38 yaşlı Emil Qurbanov “Mercedes” markalı avtomobili magistral yolun kənarında saxlayaraq düşüblər. Bu zaman 27 yaşlı İbrahim Əsədzadə idarə etdiyi “Chevrolet” markalı nəqliyyat vasitəsi ilə onları vurub. Hər iki piyada hadisə yerində dünyasını dəyişib.
Əsədzadə saxlanılıb və onun barəsində CM-in “Yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma, ehtiyatsızlıqdan iki və ya daha çox şəxsin ölümünə səbəb olduqda” maddəsi ilə ittiham irəli sürülüb.
