Bakıda evində yanaraq ölən 61 yaşlı Xuraman Həsənovanın qəsdən öldürülməsi ehtimal edilir. Bu haqda Xəzər Tv reportaj hazırlayıb.
Qaradağ rayonunda baş vermiş hadisədən sonra mənzildən qadına məxsus qızıl-zinət əşyaları və pul tapılmadığından, mərhumun həyat yoldaşı və yaxınları hadisənin qəsdən törədildiyini ehtimal edirlər.
X.Həsənova ayrı yaşadığı həyat yoldaşı ilə bir neçə gün əvvəl Türkiyəyə qızının toyunda olublar. Ötən gün Bakıya qayıdandan sonra qadın öz, kişi də öz yaşadığı evlərinə gediblər.
Gecə saatlarında bina sakinləri 3-cü mərtəbədə Xuraman Həsənovanın evindən alov çıxdığını görüb, dərhal yanğınsöndürənlərə məlumat veriblər. Hadisə yerinə gələn canlı qüvvə qapını qırıb, mənzilə daxil olaraq alovu söndürüb. Yanan mənzildə ev sahibi, ibtidai sinif müəllimi, 61 yaşlı Xuraman Həsənovanın meyitini aşkar ediblər.
Mərhumun bacısı Arzu Novruzova deyir ki, istintaq qrupu ilkin araşdırma apararkən onlara hadisənin elektrik xətlərində baş vermiş qısa qapanmadan olduğunu bildiriblər. Hətta ütünün elektrikdə qoşulu vəziyyətdə qaldığı belə deyilib.
Hadisənin qətl və ya yanğın olub-olmaması müvafiq qurumlar tərəfindən araşdırılır.
