Bakıda 32 kiloqram narkotik vasitə qanunsuz dövriyyədən çıxarılıb. Bu haqda bu gün, 11 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Polis əməkdaşlarının keçirdikləri tədbirlər nəticəsində Sabunçu rayonunda narkotiklərin qanunsuz dövriyyəsini təşkil edən əvvəllər məhkum olunmuşlar – paytaxt sakini Zaur Hacıyev və tanışı Bəhruz Cəbiyev saxlanılıblar.
Baxış zamanı onların üzərində və avtomobildə 26 kq heroin və 6 kq metamfetamin olmaqla ümumilikdə 32 kiloqram narkotik aşkar edilib.
Saxlanılan şəxslər ölkəyə İran İslam Respublikasından qaçaqmalçılıq yolu ilə gətirilən narkotikləri Cəlilabad rayonu ərazisində gizlədilən yerdən Bakı şəhərində ayrı-ayrı şəxslərə çatdırıb pul qazanmaq məqsədilə əldə etdiklərini bildiriblər.
Faktla bağlı cinayət işi başlanılıb, saxlanılan şəxslər barəsində həbs qətimkan tədbiri seçilib. İstintaq davam etdirilir.
