Sabunçu rayonunda qanunsuz silah daşıyan şəxslər tutulublar. Bu haqda bu gün, 31 yanvar tarixində Bakuplus.az Daxili İşlər Nazirliyinə istinadən xəbər verir.
Keçirilən əməliyyatlar nəticəsində rayonun Balaxanı, Ramana qəsəbələrində 37 yaşlı Niyətağa Əliyev, 53 yaşlı Vasif Qəmbərov saxlanılıblar. Onlardan ümumilikdə 2 ədəd “Makarov” tapançası, patron darağı və 9 ədəd patron aşkarlanaraq götürülüb.
Həmin şəxslər silahları bir müddət əvvəl əldə etdiklərini və satmaq niyyəti ilə özlərində saxladıqlarını bildiriblər.
Bundan əlavə, keçirilən digər əməliyyatlar nəticəsində əvvəllər məhkum olunmuş Səyyad Qənbərov, eləcə də Elçin Cəfərov, Vüqar Sadıxov və Elçin Danilyan saxlanılıblar. Onlar Ramana və Sabunçu qəsəbələrində 10-a yaxın evdən oğurluq ediblər.
Faktlarla bağlı araşdırmalar davam edir.
