Bakıda bacısını siqaretə görə qayçı ilə vuran şəxsə şərti cəza verilib. Bu haqda 26 noyabr tarixində Report xəbər verib.
İyunun 13-ü saat 22:00 radələrində Xətai rayonunda N.Çələbiyev evdə bacısının siqaret çəkdiyini görüb, habelə onun əl çantasından bir neçə ədəd siqaret tapıb. Bu səbəbdən o, bacısını əvvəl yumruq və təpiklə döyüb, daha sonra qayçı ilə onun bədən nahiyələrinə bir neçə dəfə qəsdən zərbələr endirib. Yaralı ağır vəziyyətdə xəstəxanaya çatdırılıb, onun həyatını xilas etmək mümkün olub.
Bakı Ağır Cinayətlər Məhkəməsində Çələbiyev “Qəsdən sağlamlığa ağır zərər vurma” maddəsi ilə təqsirləndirilib və məhkəmə ona 3 il müddətinə azadlıqdan məhrum edilmə cəzası verib. Təqsirləndirilən şəxsə təyin edilən azadlıqdan məhrumetmə cəzası şərti məhkum etmə tətbiq edilməklə ona 2 il sınaq müddəti müəyyən olunub.
