Bakının mərkəzində bacısını qətlə yetirməkdə təqsirləndirilən Qabil Quliyevin cinayət işi üzrə məhkəmə prosesi başa çatıb. Bu haqda 27 sentyabr tarixində Oxu.az məlumat verib.
Səbail rayonu, Xaqani bağının yaxınlığında Qabil Quliyev münaqişə zəminində bacısı Pərvanə Quliyevanı bıçaqlayaraq öldürüb. Məhkəmədə danışan Qabil Quliyev özünü təqsirli bilib və qeyd edib ki, məqsədi bacısını öldürmək olmayıb:
“Bacım ərindən ayrıldıqdan sonra çox dəyişib, yüngül həyat tərzi keçirib.
Övladına qayğı göstərmirdi, evə gec gəlirdi. Evdə olan zaman çalışdığımız qədər onu çölə buraxmırdıq. Artıq bacımın tüfeyli və yüngül həyat tərzi yaşaması məni bezdirirdi. Pərvanənin gecə klublarında əyləndiyini, müxtəlif şəxslərlə görüşdüyünü, yüngül həyat tərzi yaşadığını eşidirdim.
Bacım növbəti dəfə evdən qaçdı və mən onu evə qaytarmaq üçün axtarmağa başladım. Molokan bağında olarkən, bacımın bağın yaxınlığında sarışın bir qızla keçib getdiyini gördüm. Onlar “Xaqani” ticarət mərkəzinin yaxınlığında avtomobilin yanında dayandılar. Onlar maşında olan iti sığallayıb, həmin adamla söhbət edirdilər. Bunu görəndə mən daha da qəzəbləndim. Bacımın həmişə mənim namusuma ləkə gətirən hərəkətlər etməsi, evdə söz-söhbət salması məni bezdirmişdi. Molokan bağı boyunca onlara tərəf getdim, üzərimdə olan mətbəx bıçağını çıxarıb arxa tərəfdən Pərvanəyə yaxınlaşaraq bıçaqla iki dəfə ona zərbə vurdum. Zərbələrdən biri kürək nahiyəsinə, digəri isə döş qəfəsi nahiyəsinə dəydi. Ona zərbə vuran kimi Pərvanə qışqırmağa başladı, yerə çöməldi, sonra isə ayağa durub Molokan bağına tərəf qaçdı. Daha sonra fikrimi dəyişərək, evə qayıtmaq qərarına gəldim”.
Qabil Quliyev evə gələrək anasına və atasına bacısını bıçaqladığını danışıb və gedib polisə təslim olacağını deyib. Evdən çıxarkən polis əməkdaşları gələrək onu Səbail Polis Bölməsinə aparıblar. Bölmədə olarkən o, Pərvanənin öldüyünü öyrənib:
“Çox peşman oldum, Pərvanənin ölməsini istəmirdim. Pərvanəni qorxutmaq məqsədilə vurmuşdum”.
Bakı Ağır Cinayətlər Məhkəməsinin hökmü ilə Qabil Quliyev 9 il müddətinə azadlıqdan məhrum edilib.
