Bakının Xətai rayonunun Sarayevo küçəsi, 14 ünvanında yerləşən binanın həyətinə yığılan zibil sakinlərin narazılığına səbəb olur. Bir müddət öncə yığılan zibil yanğına səbəb olub. Bu haqda bu gün, 24 iyul tarixində Bakuplus.az Baku TV-yə istinadən məlumat verir.
Onların sözlərinə görə, artıq iki ildir ki, onların yaxınlığında abadlıq işləri aparılır, park ərazisi yaradılır.
"Bununla bağlı yaranan ən mühüm problem zibil toplantılarıdır. Tullantılar aylarla yığışdırılmır, böyüyərək az qala "zibil dağı"na çevrilir. Evimizin lap yaxınlığında uzun müddətdir böyük tullantı yığını var. Sakinlərin şikayətlərinə baxmayaraq, onu yığışdıran yoxdur və bu yığıntının həcmi günü-gündən artır. Bu gün ikinci dəfədir ki, yığıntı alışıb, böyük yanğın baş verib", - sakinlər öz narazılıqlarını bildirirlər.
Xətai Rayon İcra Hakimiyyətinin rəsmisi Pənah İmanov məsələ ilə bağlı bildirdi ki, hadisə ərazidə abadlaşdırma işləri aparıldığı üçün baş verir.
“Rayon İcra hakimiyyətinin göstərişi ilə Xətai rayon Mənzil Kommunal Təsərrüfat Birliyi tərəfindən tullantıların daşınması tam təmin olunub”,- deyə İmanov qeyd edib.
