Ötən gün, 26 yanvar tarixində Xəzər dənizində sərnişin gəmisində fövqəladə hadisə baş verib. Bu haqda bu gün, yanvarın 27-də Bakuplus.az “Azərbaycan Xəzər Dəniz Gəmiçiliyi” QSC-yə (ASCO) istinadən məlumat verir.
Dünən 21:00 radələrində Xəzər dənizinin Bulla adası (Bakı arxipelaqına aid olan ada) ərazisində, sahildən 30 km aralıda "PS 173" sərnişin gəmisinin ekipajı gəminin burun hissəsinə su dolduğunu aşkarlayıb. Hadisə ilə bağlı ASCO dispetçerinə məlumat verilib.
Hadisə yerinə yaxınlıqdakı “Qobustan” və “Qız qalası” sərnişin gəmiləri gəlib, 7 ekipaj üzvü və 25 sərnişin təxliyə edilib, onların həyatları üçün heç bir təhlükə yoxdur.
“PS 173” gəmisi isə hadisə ərazisinə gələn “Caspian Spirit” gəmisi vasitəsilə yedəyə alınaraq sahilə doğru istiqamət götürüb. Gəmidə baş verən hadisənin səbəbləri dəqiqləşdirildikdən sonra daha ətraflı məlumat veriləcək”, - məlumatda deyilir.
