Bakının Sabunçu rayonu, Zabrat qəsəbəsində məzar daşlarının hazırlanması və təmiri sexindən oğurluq etməkdə şübhəli bilinən şəxs saxlanılıb. Bu haqda bu gün, 10 yanvar tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Polisə daxil olan məlumata görə, naməlum şəxs sexin qapısını sındıraraq içəri girib. Həmin şəxs oradan 6500 manat dəyərində 2 notbuk və məzar daşlarının hazırlanmasında istifadə edilən avadanlığı oğurlayıb.
Araşdırma zamanı hadisəni törətməkdə şübhəli bilinən, qeyd edilən sexdə əvvəllər usta işləyən Qurban Bayramov saxlanılıb. Həmin şəxsin obyektdən oğurladığı əşyalar müəyyən edilərək maddi sübut kimi götürülüb.
Faktla bağlı toplanan materiallar Sabunçu Rayon Polis İdarəsinin İstintaq Şöbəsinə göndərilib, araşdırmalar davam etdirilir.
