Bu gün Xalq yazıçısı Anar Rzayevin 85 yaşı tamam olur.
Azərbaycan Yazıçılar Birliyinin sədri, şair, tərcüməçi və ssenarist Bakıda Nigar Rəfibəyli və Rəsul Rzanın ailəsində dünyaya gəlib. O, indiki Bülbül adına məktəbi, daha sonra Azərbaycan Dövlət Universitetinin Filologiya fakültəsini bitirib.
Anar Rzayev “Beşmərtəbəli binanın altıncı mərtəbəsi” romanı ilə məşhurdur. Xalq yazıçısı “İstiqlal”, “Şərəf”, “Şöhrət” ordenləri ilə, eləcə də “Heydər Əliyev” və “Humay” mükafatları ilə təltif olunub.
Yazıçı doğum günü ilə bağlı açıqlama da verib. O, işdə olacağını qeyd edib.
“Yeni yaş yeni planlar deməkdir. Bizim də gələcəklə bağlı planlarımız var. Yaradıcılıqla məşğulam, bundan sonra da fəaliyyətimi davam etdirəcəyəm. Doğum günümü isə yalnız ailəmlə birlikdə, onların yanında qeyd edəcəyəm", - deyə yazıçı əlavə edib.
