Azərbaycan Musiqi Mədəniyyəti Dövlət Muzeyində görkəmli Azərbaycan bəstəkarı, SSRİ Xalq Artisti Fikrət Əmirovun anadan olmasının 100 illiyinə həsr olunmuş gecə keçirilib. Bu haqda bu gün, 26 noyabr tarixində Day.az məlumat verib.
Tədbir Musiqi Mədəniyyəti Dövlət Muzeyi və Azərbaycan Dövlət Film Fondunun təşkilatçılığı ilə baş tutub. Qonaqlara fond tərəfindən bərpa edilmiş, 1984-cü ildə lentə alınmış və bəstəkarın yaradıcılığından bəhs edən “Fikrət Əmirov” sənədli filmi nümayiş etdirilib.
Filmin rejissoru Azərbaycanın Əməkdar İncəsənət Xadimi Cahangir Zeynallı, operatorları Əməkdar İncəsənət Xadimləri Şərif Şərifov və Rafiq Qəmbərovdur. Sənədli filmin müddəti 17 dəqiqədir.
Sonda Fikrət Əmirovun qızı Sevil Əmirova bəstəkarın yaradıcılıq irsinə göstərdikləri diqqətə görə təşkilatçılara və gecədə iştirak edənlərə minnətdarlığını bildirib.
