Azərbaycan Dövlət Akademik Opera və Balet Teatrında "Toska" operasının tamaşası 11 mart tarixində keçiriləcək. Bu haqda 6 mart tarixində Bakuplus.az məlumat verir.
Səhnəyə qoyulacaq italyan bəstəkarı Cakomo Puççininin “Toska” operası baş dirijor, Əməkdar artist, Dirijorların beynəlxalq müsabiqələrinin laureatı Əyyub Quliyev tərəfindən idarə ediləcək.
Tamaşada Toska partiyasını ifa etmək üçün teatrın rəhbərliyi tərəfindən Ukrayna Milli Operasının solisti, Ukraynanın Əməkdar artisti, Vokalçıların beynəlxalq müsabiqələrinin laureatı Viktoriya Çenskaya dəvət olunub. Əsas partiyalardan biri olan Kavaradossi rolunu Azərbaycanın Əməkdar artisti, İtaliyanın La-Skala Akademiyasının solisti Azər Rza, Skarpia partiyasını isə Xalq artisti, Almaniyanın Manheym Milli Operasının solisti Əvəz Abdulla ifa edəcəklər.
Tamaşada, həmçinin əməkdar artistlər Cahangir Qurbanov, Tural Ağasıyev, solistlər Aqşin Xudaverdiyev, Nazim Mahmudov və başqaları iştirak edəcəklər.
Nümayiş teatrın solisti, mərhum Xalq artisti Əli Əsgərovun xatirəsinə həsr olunur.
Biletləri teatrın və şəhərin kassalarından, həmçinin onlayn əldə etmək mümkündür.
